A chhanna awm chhun chu Thei e tih a nih mai laiin, mi ṭhenkhat thil chhiar zau vak lote hian hetiang hian an zawt leh khauh zel a. An demawm hran loh… mahni zir loh lam leh mahni kal lohna lam hi chu hriat hi a har reng a ni. Khitiang zawhna a awm fo takah chuan han inhrilhfiah tum teh ang.
A hmasa berah chuan, AYUSH awmzia hi kan hriat a ngai a. Damdawi lam thiamna hrang hrang awm zingah hian MBBS lam kan tih mai, Allopathy hi khawvel pum huapa ram hrang hrangin damdawia inenkawlna atana an pawm tlan leh tlanglawn ber a ni a. Allopathy bakah hian India ramah chuan Ayurveda, Yoga & Naturopathy, Unani, Siddha leh Homoeopathy te hi damdawia inenkawlna atana Sawrkarin a pawm niin, zirna in te dinin, India Parliament ngeiin heng system te enkawlna tur hian dan tam tak a pass hial a ni.
A pahnihnaah chuan Doctor kan tih mai, duly qualified medical practitioner, hi India ramah chuan MBBS zirchhuaka licence nei bakah a chunga kan tarlante zir chhuak a, practice phalna licence (Council Registration) nei zawng zawngte a huam vek a ni. Chumi lantirna tur chuan Parliament dan siam pakhat en lawk i la:
2 (2) No person, other than a practitioner of Homeopathy who possesses a recognized medical qualification and is enrolled on a State Register or the Central Register of Homoeopathy-
Provision of Section 15 Of Homoepathy Central Council Act, 1973
(c) shall be entitled to sign or authenticate a medical or fitness certificate or any other certificate required by an law to be signed or authenticated by a duly qualified medical practitioner;
A chunga Parliament dan siam khi 1973 kuma Homoeopathy doctor-te kaihhruaina tura siam niin, Section 15, Clause 2 (2) (c) chuan medical certificate emaw, fitness certificate emaw, certificte dang reng reng pawh duly qualitifed medical practitoner -in dan anga hming ziah hnan tur leh finfiahna pe tura a phut chuan an hming an ziah hnanin an finfiah thei ang, a ti a ni.
A pathumnaah chuan Indian Systems of Medicine kan han tih bik – Ayurveda, Unani leh Siddha doctor te chungchanga Madras High Court thuchhuak kha han en ho leh i la. Justice J Nishabanu chuan Unani doctor-te’n Medical Certificate an pe thei, tiin thutlukna a lo siam tawh a nih kha.
Eng pawh lo ni se la, mipuite kan ṭhang harh chho zel a. Kan ram chhul chhuak ngei ngaihsanna leh chawilar duhna a lian zel a. India ramin hma a sawn zel ang a, a ṭhang chho zel ang a, AYUSH pawhin hma a sawn chho ve zel ang a, mipui nawlpui pawhin thil kan hrethiam chho zel turah ngai ang.